علامہ خادم رضوی کی ہنگامی طور پر جیل سے ہسپتال منتقلی

لاہور (اُردو پوائنٹ اخبارتازہ ترین۔ 15 دسمبر2018ء) علامہ خادم رضوی کی ہنگامی طور پرجیل سے ہسپتال منتقلی، ہفتے کی شب کو کوٹ لکھپت جیل میں قید تحریک لبیک کے سربراہ کو دل میں تکلیف محسوس ہوئی جس کے بعد انہیں فوری ہسپتال لے جایا گیا۔ تفصیلات کے مطابق لاہور کے کوٹ لکھپت جیل میں قید تحریک لبیک پاکستان کے سربراہ علامہ خادم رضوی کی طبیعت اچانک بگڑ گئی۔

جیل حکام کے مطابق تحریک لبیک کے سربراہ خادم رضوی کو ہفتے کی شب کو دل میں تکلیف محسوس ہوئی۔ دل میں تکلیف محسوس ہونے کے بعد علامہ خادم رضوی کو ہنگامی طور پر لاہور کے ایک مقامی ہسپتال لے جایا گیا۔ ہسپتال میں خادم رضوی کی ای سی جی اور دیگر ٹیسٹ لیے گئے ہیں۔ ڈاکٹرز کے مطابق علامہ خادم رضوی کی ای سی جی اور دیگر ٹیسٹ کی رپورٹس ٹھیک آئی ہیں، ان کی جان کو کسی قسم کا خطرہ نہیں ہے۔

ای سی جی اور ٹیسٹ کی رپورٹس درست آنے کے بعد خادم رضوی کو دوبارہ کوٹ لکھپت جیل منتقل کر دیا گیا ہے۔ واضح رہے کہ آسیہ بی بی کیس کے بعد ملک میں پرتشدد مظاہرے کروانے، امن و امان کو خراب کرنے، آرمی چیف، چیف جسٹس اور وزیراعظم کو قتل کی دھمکیاں دینے کے باعث خادم رضوی اور تحریک لبیک کی دیگر قیادت و کارکنوں کو گزشتہ ماہ کیے جانے والے بڑے کریک ڈاون کے دوران گرفتار کر لیا گیا تھا